港台錄音一:食西北風

噚日有個九十年代中在中大藝術系畢業、在香港文化界薄有名聲的朋友發了一個email來，內容如下：
「手頭的research又出唔到糧……今日銀行只有133元。前幾天發窮惡，想起一些較實際的辦法。就是開列一張明碼實價的價目表，以後有人找你做job，就電郵份價目表過去。我覺得大家都咁做既話，d人以後至會明寫字同「創意」係要錢既！」
價目表其中幾項分別是：新聞稿及雜文一字八毫；專題訪問稿一字一元連訪問；演講及主持每次一千蚊起；策劃活動小型千五、中型二千五、大型五千。我唔知聽眾覺得貴唔貴？但那些傳媒編輯呀講座主辦機構呀就肯定覺得貴。點解？因為佢地真的以為寫字同創意唔使錢架。
你問香港大部分文化工作者，每個人都有一段剝削血淚史。以我為例，呢一兩年曾經替大學、公信第一的報紙、新興青年智囊組織、大型書店講講座，每次都預備成個禮拜睇一大堆書加上腎上腺上升。但每次都係一個仙都冇，最多係送幾本你唔要的書、或者一個放手機的紀念座，加埋兩句多謝。寫稿係有錢，但少都得人驚，替某大報寫星期日副刊三千字連相只得八百蚊。一個月寫到盡都係得五六千蚊，點生活？
所以大家唔好再以為香港好尊重知識產權，香港人只係欺善怕惡，大企業出律師信告人就講尊重，一講到我們這些知識個體戶自由身工作者，大家就會話：佢地食理想呀嘛，係要付代價，係唔會有職業保障架啦。
講公民社會，一定要先講對知識人文化人的尊重。不如就由這間電台做起。我用了六個工作小時寫這五篇隨筆，由西貢的屋企山長水遠黎錄音。邀請我來的節目主持和幫我錄音的技術員都有糧出，唯獨係我出完時間力氣之後居然一個仙都冇要返屋企吃西北風。
咁o既現況，係咪有需要改變呢？